عبير صلاح الدين في مرمى الانتقادات.. وفنانون يدعمون محمد صبحي

قسم التحريرسبتمبر 10, 2022آخر تحديث: سبتمبر 10, 2022

0 2 دقائق

بعد هجومها على الفنان المصري الكبير محمد صبحي، واتهامه بالتضييق عليها في الوسط الفني، تعرضت الممثلة عبير صلاح الدين لموجة انتقادات.

وفي تصريحات تليفزيونية سابقة، قالت عبير صلاح الدين، صاحبة دور “عبلة” في مسلسل “عائلة ونيس”: “محمد صبحي حاربني علشان قلت (لا) ورفضت استكمال مسلسل ونيس”.

عبير صلاح الدين.. انتقادات لممثلة هاجمت محمد صبحي

تصريحات عبير صلاح الدين لم تمر مرور الكرام على الوسط الفني والإعلامي في مصر، وشكك كثيرون في روايتها حول المسلسل ومحمد صبحي، ومنهم الإعلامي محمد الغيطي الذي سألها: “ما اشتغلتيش مع غيره ليه؟”.

وأضاف الغيطي، في برنامجه على فضائية “الشمس” المصرية: “عبير صلاح الدين من الفنانات اللي طالعين بقوة، بس مش فاهم ليه فجأة تشن حملة على محمد صبحي، طيب هو رفض يشغلك ما اشتغلتيش مع غيره ليه؟، الموهبة الحقيقة لا تتوقف على منتج أو ممثل أو مخرج”.

وأردف: “كنتي اشتغلي مع أي حد تاني يا عبير.. مفيش مبرر لهجومك ده غير البحث عن التريند والشو.. أنا اشتغلت معاه لكن ما شفتش منه اللي انتي بتقوليه ده.. هو ممكن يكون صارم، حازم، ديكتاتور، وصاحب الفرقة والمخرج لازم يبقى ديكتاتور.. كلامك لا معنى له، وكلام لا يستحق أن يأخذ كل هذا الاهتمام الإعلامي”.

من جهته، دعم الفنان أحمد رفعت، الفنان الكبير محمد صبحى، وعلق على تصريحات عبر صلاح الدين، قائلًا: “غريبة إنه ما حاربنيش خلال 10 سنين شغل معاه، بل كان بيحتفي بيا على الملأ.. ومن ونيس وأحفاده ما اشتغلناش مع بعض لكن يظل أفضل كواليس عاصرتها كواليس الأستاذ صبحي.. أقسم بالله كانت الروح في اللوكيشن عظيمة، وأشهد الله أنا كنت بلومه لما لي من علاقة قوية وودودة معاه.. كنت بلومه لانشغاله بكل تفاصيل الكل ونسيانه لنفسه”.

وأضاف رفعت، الذي ظهر في مسلسل “الاختيار 3”: “محمد صبحي نختلف على بعض التصريحات أو المواقف العامة طبعا، لكنه يظل مدرسة فنية كبيرة جدا وعلامة في تاريخ المسرح العربى. نشرح شوية.. بيقولوا إنه كان بيشترط أن اللى يشتغل معاه يفضى له وما يشتغلش مسلسلات تانية، أنا كنت بشتغل مسلسلين معاه، عزت أبوعوف الله يرحمه كان أكتر واحد بيشتغل أيامها، ولما كان يتأخر ساعة أو حاجه يعنفه بهزار وتقلب ضحك ويحضنوا بعض، بيقولوا إنه مبيحبش حد يظهر عليه أو جنبه”.

عبير صلاح الدين: محمد صبحي حاربني

وقالت عبير صلاح الدين خلال لقائها مع برنامج “كلام الناس” على “MBC مصر”: “رفضت استكمال تصوير باقي أجزء مسلسل ونيس، شعرت أني لا أقدم جديد (..) من هنا حاربني محمد صبحي لأني قلت لا، هو حارب نجوم غيري كتير ولو لاحظنا هتلاقي إن الناس اتغيرت في مسلسل عائلة ونيس من أول جزء حتى الجزء السابع”.

وأضافت: “محمد صبحي اللي بيقول له لا أو بيزعله بيموته في الموسم اللي بعده وبيسفره، ونصحوني أعتذر لمحمد صبحي عشان ما أقعدش في البيت، ولكني مش ندمانة ومش هعتذر لأني ما غلطتش، وده حقي كممثلة إني أقول لأ، وبدأت أحس بحاجة من نوع أنا اللي عملتك من غير ما تحسي”.